553

مالی دونیا انگار خا تنی لیمه آتش هرچی کو بو آخر کلیمه
قدیمی کوچه وو یال یال سرین بر هر چی ده وتیندی یون دیم نه دیمه

554

کی یه دره هم بر ده بر ژننده انی نُه نمی یه مه چش پرنده
نه بر ده واکرین مه دل بترکه هچین مه ره بد تر از این نبونده

555

اگر هوچو نداندی غم نداندی اگر داندی فعلا یون دم نداندی
اگر زیاد تر از جاونونی نی یی شکری خدا هشکین مو کم نداندی

556

مه دل خوانده هشکینی دل نلرزه خدا مه دشمنون مو ونه گرده
مه دل ونه رینده دکل بواژی مه چش دله حسودی دل بترکه

557

مرتون مه غم و غصه ده نخونن مه ده چه کار بسری یه نزونن
الهی یون دونیا ده کوفه ببو هجه شوندی هشکین مه یار نبونن

558

مه چشی خون نه یاله طشت ببی یه مه که وو زندگی پلشت ببی یه
ادر مه ره نفرین ناله هاکرته اشون دو سین مه کره مشت هابی یه

559

هم فیفه امستی باله ببی یه هم برکه وو جا چال چاله ببی یه
ادر نه غم و غصه ده بخورته مه کره یی گره یاله ببی یه

560

امشه چیچه مه دل ده وم بگرته هم کیی دار دیفار ده غم بگرته
مه دل ده سر بدی یه دره شونده مه غمی نه ده دستی کم بدی یه

561

مه دل مه غم ده خلی خلی پانده انی هوچو نبی یه نه ره دانده
برمه خلی خلی مه ده واکنده مه چش مه دلی چم و چارده زونده

562

اربونی سه جُوی دله یی توپا ترفه وو دونه و وآرشه وو نیم وا
کلی خولنجه وو نه وری دیگی نه کونه فهره وو دونه وو کلوا

563

چله ده کو رو کرته کی ره شونده یکه تایی نسته کی غم ده خونده
درم شوره یون دونیا غم نخوره شا ه بمرته ساله مگر نزونده

564

اشون تا صب نختی تو نمی یه بیخو تره ممو جوا وابی یه
مرتون مه ره خبر آونن وانن تو پیر به بی یه وو خلی بشکی یه