205

گو گولو جاری ده آباد واکرین هم پشرونی روح ده شاد واکرین
یون دونیا زیندونه تا کو بکنین اشتره اشتون ده آزاد واکرین

206

شامز زونی وری یوز دار بکالین اشتون زبون ده خاری وو هادارین
اگر پینده هم زبونو نمره کاتون ره دکلو فارسی نواژین

207

مه چش و مه پنون استال ببی یه دریا یی وُی وری قندال ببی یه
مه سینه نواژه غلبال ببی یه مه آل مرتونی حرف مو لال ببی یه

208

هَشکین اشتون بطوم ده سیر واکرته خدا پیغمبرون ده ویر واکرته
بیدادی ظلمی دونیا ده بگرته هم ایمومی زمونی دیر واکرته

209

یکه کسونو حرف ده یال نکرین هر چی یی خاطری قال قال نکرین
بخورین و مرتون ده بخورنین اشتون مال و منال ده چال نکرین

210

مه سری موی اسمونی یال ببی یه مه دل پسونی پلو مال ببی یه
مرتون مه ده وانن سُه آل ببی یه مه آل مرتونی حرف مولال ببی یه

211

حجاب خا مستنه یی یادیگاره انی یون رسمی خاره بر قراره
حجاب هم آبرو وو اعتباره یون مو ویتر هچین چیچ خا ده کاره

212

سری پیری تاژه مه شور بمی یه مه تن و دست و بالی زور بمی یه
قلم منده عه خا ره شعر بواژی چه خاره موقعی مه هور بمی یه

213

هدی شهری خلی مرد و غیورن نه کاتا خلی خلی خاره پورن
اشتون بار ده هجه ته سر نووننن هر جه درن مرتون سنگی صبورن

214

بیرو تا جین جی وون ره غش هاکرون به جایی هم دیگر نالش هاکرون
دو دل وشتر ندانون جونی ماکا اگر بونده بیرو آلش هاکرون

215

مه دلی نشونی مه هر دو دسته مه جون ده ته بگرته وسته وسته
مه ده دعوت کرته اشتون عروسی مه دست و مه په ده خینی دبسته

216

هر وقتی ده ی دله مه چش پرنده هم کار و هم کاسبی خاره بونده
اگر اَو تو بشون دعا هاکرون ایشا لله کربلا یی ره واشونده